Dilber ciwane şêrîn û rinde
şox û şepale bejin bilinde
Serî gihaye ber taqê gerdûn
Li ser serê wê taca Ferîdûn
Bi jêr de berdan gulî û reşbisk
Kiras bihare, sor û zer û kesk
Dur û cewahir ji dême, xweş rû
Kevanê Behram-çopîne ebrû.
Du çavê mêrkuj, pingav û petrol
Lê sîng û gerden Cezîr u Bîngol
Hêstir ji çavan cobar û robar
Li ser me digrî, nalîn û hawar
Hebûn û dewlwt, li her der û cî
Em têde jar û bê nan û birçî
Bêgane têde bûne ciwanmêr
Xistin destên xwe ev dewlet û zêr.
Li ser me paşa, bi top û leşker
şex û begên me ji wan re rêber
Kurdên perîşan-gavan û gundî
Kola û bindest, zencî û hindî
Ez tim dinalim, hawar û gazî
Destên hev bigrin, birçî û tazî !
Bi ser çiyande bi deng û halan
Bi zor bistênin ji dijmin talan
Heçî nikarî doza xwe bigrî !
Di bin zencîrê dijmin de dimrî
Ewê nikarî hilkişî ser şax
Di bin lingan de diçî, dibî ax.
Eger nexî dest tu dar û dewlet
Di nêv cihan de tu nabî milet !
Dijmin gihaye, bi top û leşker
Êrîş dibî me wek dêwê sêser
Çavên xwe vekin, binêrin Vîtnam
Bûne yek perçe, pismam û dotmam
Bi xwîna dijmin sor kirne meydan
Cergên neyaran xweş dax û key dan.
Li ser serê wan tin gulebaran
Zarok tên kuştin wek berx û karan
Lê tim diçin pêş hemî jin û mêr
Dijmin dişkênin wek piling û şêr
Bi camêrî tev xwe didin kuştin
Naxwazin bijîn bindestê dijmin
Divên ko bijîn serbest û azad
Di qada xwe de rûgeş û dilşad
Bikevin rêza miletên serbest
Vaxwazin bijîn hejar û bindest
Xwelî li we bî, şazde milyon kurd
Bindestê dijmin hejar û zigurd !
Belengaz, reben, mest û perîşan
Nikarin bixun têr nan û bacan
Bere em bimrin, herin av û av
Di nav xelkê de bê dewlet û nav
Li şûna axê, çewîşê Nuqtê
Malê me dixun bi me çi xweş tê
Çekan dikirin da hev bikujin
Dijmin xwîna me hawîr dimijin
Dixwazim rabin ji tamara xew
Ji dijmin re em nabin çêlekew
Pêzan û rêzan, bi tektîk û jîr
Hozanên rêber bibin destegîr !
Bûkê biguhêzin, bigrin Kurdistan !
Li her der bikin govend û dîlan
Em tev de bixun hatin û hebûn
Di nav me de kas nebî Cigerxwîn.
Lê win zanibin qerêj û hebûn
Bikêr we nayên roja serxwebûn
Lê ê ko îro bidî bi rindî
Para wîye tim payebilindî.
Dema kurd bibî serbest û azad ;
Êçikûs û pîs dimênin bêdad
Çavên xwe vekin kurdên borcewaz
Rencberê dijmin, tirêk û tolaz
Destên xwe bidin kurdên palewan
Dekevin meydan, bi mal û bi can
Ev roja ya we ye, werin bi rindî
Destên xwe bidin karker û gundî
Bajarî, gundî, jîr û xwendewar,
Hawîr bigerin weke gurên har
Tenê bi zanî û bi tektîk û pîş
Bi pêş ve bajon hemî kar û îş
Markisî, Norsî, tev welatperwer
Destên hev bigrin, bibin yek çeper
Ta xanî ava nekin bi rindî
Li ser boyaxê mekin dubendî.
Ji destê dijmin me welat derxist
Bere bên meydan çend awir û rist
Wê çaxê rate ku em bigrin hev ;
Lê ne bi kuştin, bi ziman û dev
Ma kî dibêjî: qelse kewê min ?
Yan kî dibêjî: tirşe dewê min ?
Lê îro dijmin serdarê welat
Em jî ji hev re bibin ar û pêt.
Xurtî ya me ye, yektî û zanîn
Koka xebatê pê tête danîn
Destên we bişkin, çi ton mirovin ?
Kengî şiyar bin ne hirç û hovin ?
Diçin bihiştê gernas û mêrxas
Dohej şûna ên bindest û pêxwas
Xwenda û zana dijîn bi rindî
Xwelî li wî bî, heçî ne xwendî.
Bêtir ew kurdên gernas û dijwar
Nexwendî, birçî, boyeçî, binbar
Bexda û Mûsil, Helap û Bêrut
Hatin dagirtin ji kurdên pêrût
Bin darê dijmin kola û bindest
Di bin baran de pişta wan şikest
Dijmin bi xwendin wezîr û paşa
Li ser pişta me dixun me-aşa
Ji dijmin re em xweş dibin leşker
şoriş gur bûye lê em naçin şer
Sewlwmwndên kurd weke hirç û gur
Malên xwe didin dijmin hûr û gir
Ne didin şoriş ne didin partî
Nayêne gotin herçî veşartî
Bi ser de êrîş me dikin wek hov
Çavên wan birjin, ev renge mirhov.
Ji bo we ye em divên serbestî
Ji ser we rakin dîlî û mestî
Em bi mal û can, tenê win bi mal
Xebatê bikin tev dost û heval
Xwelî sein win, gemar û çikûs !
Bikevin dexlên we reqîk û sus
Dijmin bistêni ji we mal û qad
Birizin, bimrin, bê kok û binyad.
Xebetkar dema dikevin zindan ;
Li ser wan nagrîn, dikenin bi wan
Bi wê gemara ber destên dijmin
Di ser me ra win xwe bilind dikin
Devê xwe li me vekirye reşdêw
Ji xew ranabin, kurdên kurê Gêw
Hawar dikim ez bi rengê Zardeşt
Bese, nemaye, dema def û xişt
Dema tnag û top, firok û sarûx
Nayên hana me Yezdan û Merdûx
Warên xwe berdan sawîr û goman
Candar gihane rajorê ezman.
Di vê demê de bê xwendîn û çek
Li ber diwarên be nan û parsek
Di bin lingan de wek pûş û pelax
Dimrin, dirizin, hemî dibin ax.
Rabin bi xurtî, milhasin û mêr
Li ber dijmin em rabin wekî şêr
Di bin kevir de namênî giya
Ji ber bahozê xwar nabî çiya
Cî nadin revê qet şêr û piling
Zaro me nebir sedsalî Firing
şêrên: Dimyat û Ekka û Hettîn
Navê me kurdan bi zêr nivîsîn.
Bav û kalên me: Hewrî û Mîtan
Bi zor danîne sînorên kurdan
Kardox û Kaşo, Madî û Sobar
Wan bi xwîna xwe parastin ev war
Ne şerme, ko em gernas û kurdin
Ji dijmin re em warên xwe berdin
Bi hev re rabin cotkar û karker
Zana û rêber, pala û rencber.
Destên hev bigrin bi rast û ronî
Di qada xwe de şazde milyonî
Kî bûye dewlet bi tizbî û xişt ?
Parsek û bindest çon diçin bihişt ?
Cegerxwin
Şîrov
Nivisen Baldar nîne
1
0 Şirov
Şîrova yekemîn ti binîvîse.